بالمحبة تعاهدنا ،
بلحب رجعنا ،
و كيف كل حكاية ، يكون اولها حب و اخرتها عشرة ،
كي يكون لكلام فيها كيف الضميدة يداوي و ما يجرح
صباح الفرحة
صباح القلوب الطيبة المعبية بالمحبة
صباح الطيبة المتخبية وراء التكشبيرة
صباح القلب المخبيتو التصويرة
صباح الطفل الصغير إلي مخبيتو الكرافات
صباح ألوان الدنيا بين ضلوععنا مخبيها تعب الأيام
صباح البنة المخبية في كل واحد فينا
صباح الخير و الفرحة
صباح الصغير إلي معشش فينا و موش حابب يكبر
صباح الناس المتحررة من عقد الكبر و إلي يجي و ما يجيش
صباح محبة الدنيا بقلب صافي وافي من غير تخمام في البارح و من غير خوف من غدوة
بربش علبنة و المحبة
علتبسيمة الدافية لبنينة ،
لوج علي يعبي القلب الحالم الفارغ
لوج علغايب ، و المتغشش لاقيه و رضيه ،
و حيي الصباح الي ذبل ،
الشمس خليها تطلع ملضلوع ، و دفاها يملي تراكن القلب بمحبة ضواية ..
تفكر الي قلبك هواه بهدايا بنينة ،
بكليمة حنينة ،
حتا بنوارة مقلعة و الا مسروقة من جنينة ،
هدي كلمة خير ، تبسيمة ،
اهديو صباح الخير ،
اهدي كلمة نحبك ،
اهدي الفرحة ..
المحبة راهي لا تتباع و لا تتشرا
المحبة رزق ،
المحبة اسرار
مخبية بيني و بينك ،
كي تتشاف في العينين و تتوشوش في الوذنين
و محلاها المحبة كي تبدا مباحة
بسر الغزرة وكلمتها
البوسة وبنتها
المسة وخرّافتها
وب الضحكة و حكايتها
وشوش لغيرك و ماتخبيهاش ،
متخبيش حنيتك ،
عيش المحبة و يدك ليد غيرك ما تسلم
افرح و من قلبك سامح
تذكر كل ذكرى جميلة مع الي معاه حلمت و تعلمت ،
حوس بين ايام حياتك و تفكر قلبك قداش دق و ود ،
و إحساسك قداش تعلق و حب في كل حكاية بدات و كل حكاية وفات و في كل حكاية ليها الف نهاية ..
تفكر و اسال روحك ، جربت حبيت ؟
و قداه قلبك كان كبير و علا
غيرك كان حنين ،
اسال روحك ، قداه تحب الي كبرك و عطاك
وملدنيا ماحرمك ،
اسال روحك ، قداه تحب بلادك ، و قداه تعشق تاريخها و قداه تتسابق انتي و اندادك علا محبتها ،
اسال روحك قداه من مرة جربت تسمع قبل ما تتكلم ،
و
قداه من مرة تسلم علي نساك و في و جهو تتبسم ،
تفرح للي في يوم بكاك ،
قداه من مرة جربت تعطي للي كبرك و رباك ..
قداه من مرة تنسا الي فرّق و ليه تحاول توصل و توّصل ،
و ليه تعطي و تقدّم من غير ما تخممّ ..
جرب حب ،
جرب عيش ،
قول نحبك ، و خليك معايا ما تمشيش ، و معاك نحب نعيش ..
جرب كون انسان ، تحب من قلبك و تعيش بلمحبةّ مرتاح ..
