4/10/2019
وشنية الدنيا من غير محبّة
وشنية الدنيا من غير محبّة
...
دنيا لكلها نوّار لا كره في القلب لا في القفا مسبّة
...
شنوة الدنيا بلا ضحكة و تبسيمة... بلاش ياسمينة، فل و قهيوة وأصوات صغار و جنينة
...
شنوة الدنيا بلاش صاحب، صديق صدوق... لأسرارك صندوق... في غصراتك معاك و في فرحك هو لول، صاحب من تراب الجنة مخلوق
...
شنوة الدنيا بلاش لمّيمة، بلاش صوتها و هي تقرى في القرآن و بلاش دورتها في دواير الدار تدور معاها روايحها البنينة
شنوة الدنيا بلاش الوخي و الوخيّة...
البنيّة في عز خوها تعيش بيّة و بيد أختها تقوى و تتحمل مشاق الثنية
...
و شنوة الدنيا بلاش شريك... يتنفس هواك و يحلف بعينيك... في الخوف بجنبك كابس على يديك... يطمنك، يدفيك... يبيع الغالي و يشريك... و يدور الدنيا و عمرو ما يبطى عليك...
يرجعلك و يكمل معاك و بيك الطريق...
و شنو انا بلاشك إنت......
آش تسوى لحظة من غيرك تتعاش...
و نجمة تضوي على إسمك ما تتسماش
آش تسوى البلايص و الوقت...
آش تسوى الفرحة، من غيرك عذاب و مقت
و آش الدنيا بلاش كلمة مزيانة، لحن و غناية... الدنيا ما تسوى شي، لا مالكها ملَكْ و لا هي تاج على راس بَيْ
..
Inscription à :
Articles (Atom)
